सासु-ससुरा होइन बुवामुवा भन, बुहारी होइन छोरी मान !

नारी खबर / असार २९, २०७६ - आइतवार


काठमाडौं – कुनै जमाना थियो, सासुले बुहारीलाई हेयको व्यबहार गर्ने र बुहारीले सासुलाई दुस्मनलाई जस्तै देख्ने ।

तर अचेल जमाना फेरिएको छ, जाजरकोटको बारेकोटमा सासुबुहारी आमाछोरी जस्तै व्यवहार गर्छन् । सासुले बुहारी संग र बुहारीले सासुसंग खुलेर आफ्ना समस्या, दुखसुखका कुरा गर्छन् ।
सासुबुहारीको समस्यालाई अझ प्रगाढ र मजबुत बनाउनका लागि गाउँपालिकाले सासुबुहारी कार्यक्रम नै सञ्चालन गरेको छ ।

समाजको विकासक्रम धेरै अगाडी बढीसकेको छ । समाजको विकास संगै विकृतिका रुपमा रहेका सामाजिक, सांस्कृतिक र परम्परागत मान्यताहरु पनि पछिल्लो समयमा तोडिँदै गएका छन् । त्यसैलाई आत्मसात् गर्दै अगाडी बढ्नका लागि यस्तो कार्यक्रम सञ्चालन गरिएको गाउँपालिका उपाध्यक्ष ओमा शाहीले बताइन् । कतिपय अबस्था सासु बुहारीकै बिचमा बेमेल र मनमुटाबका कारण हिंसाले ठूलो रुप लिएको  हुन्छ । परम्परागत सोचले पनि बिभेद निम्त्याएको भन्दै कार्यक्रमले विचार र व्यवहारमा एकरुपता आउनुपर्नेमा जोड दियो ।

उनका अनुसार गाउँपालिकाले सासु र बुहारीको रुपमा रहेको सम्बन्धलाई आमाछोरीको सम्बन्धमा परिणत गर्ने सासुबुहारीलाई पुरस्कार दिने घोषणा समेत गरेको छ ।

बारेकोट गाउँपालिका वार्ड नं ३ निवासी दिपा सिंह र कौशिला सिंह सासु बुहारी हुन् । पहिले बुहारी कौशिलाले गरेका काम चित्त बुझाउन नसक्ने सासु दिपा सिंहलाई अहिले त्यस्तो लाग्दैन । कौशिलालाई पनि घरमा हुदाँ माइतीको यादले सताउने गथ्र्यो । तर सासुले आमाको जस्तै माया दिएपछि उनलाई एक्लै भएको महशुस हुन्न ।

जति मेहनत गरेर, दुःख गरेर काम गर्दा पनि सासुको चित्त बुझाउन नसक्नेहरु र बुहारीले आफ्नै अविभावक नसम्झनेहरुका लागि यस्तो कार्यक्रम निकै प्रभावकारी भएको छ ।
“पहिला लाग्थ्यो आफ्नै जन्मदिएको आमा भएको भए यस्तो व्यवहार कहाँ हुन्थ्यो र ?” उनी भन्छिन् “तर आजभोली भने हामीहरु सासुबुहारी कम र आमाछोरी बढी ।” दिपा र कौशिलालाई यसरी एकाएक परिवर्तन गराएको हो बारेकोट गाउँपालिकाको जनचेतनामुलक कार्यक्रम सासुबुहारीले नै हो ।

सासु र बुहारीको सम्बन्ध भनेको एकले अर्कालाई देखिनसहने, एकले अर्कालाई दोष थोपर्ने मात्र हो भन्ने बुझाइले घरमा झगडा निम्तिने डर हुन्छ ।

बारेकोट गाउँपालिकाकै हजारी शाहीलाई पनि बुहारी मनपर्ने थिएन । न त बुहारीले गर्ने काम नै । उनी कहिल्यै बुहारीलाई कामको जस दिने गर्दिनथिन् । जब गाउँपालिकाले सासु र बुहारीलाई संगै राखेर सासुबुहारीको सम्बन्ध कस्तो हुनुपर्छ ? सासुले बुहारीलाई कस्तो व्यवहार गर्नुपर्छ ? र बुहारीले सासुलाई कस्तो व्यवहार गर्नुपर्छ भनेर सिकायो त्यसपछि भने उनलाई बुहारी कमला शाहीका हरेक काम मन पर्न थाल्यो । आजभोली सासुबुहारीको सम्बन्ध आमाछोरीको भन्दा कम छैन ।

उत्कृष्ट सासुबुहारीले समाजमा समेत सकारात्मक सन्देश दिन सकुन भनेर यसो गरिएको गाउँपालिका उपाध्यक्ष शाहीले बताइन् । सासुले बुहारी भएपछि सासु भएकी हुँ र बुहारीले सासु हुने हो भनेर सम्झ्यो भने सासु र बुहारीको सम्बन्धमा समस्या नहुने धारणा शाहीको छ । उनले आगामी दिनमा पनि सासुबुहारीको सम्बन्ध थप प्रभावकारी होस् भनेर दुई लाख बजेट बिनियोजन गरेको जानकारी दिइन् ।

“पहिला पहिला सासुले बुहारीलाई दमन गर्ने, यो भएन त्यो भएन भन्ने हुन्थ्यो तर अहिले सासुलाई त मुमा भन्ने प्रचलन आइसकेको छ । मुमा भनेको त धेरै फरक रहेछ है । मुमा भन्दा बुबा भन्दा खेरी मनमा भएका कुरा व्यक्त गर्दारहेछन ”, उनले भनिन् “जस्तै छोरी उस्तै बुहारी । जस्तै आमा उस्तै सासु हो भनेर माया गर्ने, सम्मान गर्ने गर्नुभयो भने पुरस्कार दिन्छौ पनि भनेका छौ । ”
उनका अनुसार पुरानो कुसंस्कार मेट्नुपर्छ भन्ने परिवर्तन भएका छन ।

बारेकोटमा यस्ता उदाहरणहरु छन् जो पहिला सासुबुहारी थिए अहिले आमाछोरी जस्तै छन् । सासु
मनमति सिंह र बुहारी बालकुमारी , सासु विना कुमारी सिंह र बुहारी गौरी सिंह, सासु देवी शाही र बुहारी प्रेमकला शाही तथा सासु कल्पना शाही र बुहारी दिल्ली शाही नमुना सासु बुहारीका उदाहरण हुन् ।

पहिला पहिला मनमुटाब हुने भएका कारण बृद्धाअबस्थामा हेला गर्ने छोराबुहारीहरु बृद्धा अवस्थाका आमा सासुको कुरा बुझेर झगडा गर्दैनन् । माया ममता र सद्भाव छ ।

“छोराबुहारीले आमाबुवालाई जस्तै व्यवहार गर्नुपर्यो भन्ने व्यवहार विकास भएको छ” उपाध्यक्ष शाही भन्छिन् “छोराछोरी हुदाँहुदै पनि बृद्धाआश्रममा पठाउने गर्दा त्यो आमाको मन कति दुख्छ होला, भन्ने बुझेका छन् ?”


प्रतिक्रिया दिनुहोस


सब्य र भब्य तरिका ले आफ्नो धारणा राख्नुहोस।

error: Content is protected !!