प्रदेश २ काे निजामती सेवामा महिलालाई ५० प्रतिशत आरक्षण

वीरगंज- प्रदेश २ सरकारले निजामती सेवामा महिलालाई ५० प्रतिशत सिट सुरक्षित गर्ने व्यवस्था गर्न लागेको छ । प्रदेश निजामती सेवा सम्बन्धी ऐनमा महिलालाई ५० प्रतिशत आरक्षणको व्यवस्था गर्न लागेको हो । \

प्रदेशसभामा ‘प्रदेश निजामती सेवाको गठन, सञ्चालन र सेवाका शर्त सम्बन्धमा व्यवस्था गर्न बनेको विधेयक’ माथि छलफल सकिएको छ ।

निजामती सेवालाई समावेशी बनाउन आरक्षणको व्यवस्था गरिएको मूख्यमन्त्री लालबाबु राउतले बताए । संविधानले खुला प्रतिस्पर्धामा ४५ प्रतिशत आरक्षणको व्यवस्था गरेका छ समूहमा ५० प्रतिशत सम्बन्धित समूहका महिलाका लागि आरक्षणको व्यवस्था विधेयकमा गरिएको छ ।

त्यसो हुँदा आरक्षित पदमा आउने मध्ये आधा महिला हुनेछन् । साथै आरक्षणको सुविधा भने एक व्यक्तिले एक सेवा अवधिमा एक पटक मात्र पाउनेछ ।

सैद्धान्तिक छलफलमा उठेका प्रश्नहरुको जवाफ दिँदै मुख्यमन्त्री लालबाबु राउतले छिटो कानून बनाएर आफैं कर्मचारी भर्ना गर्ने बताएका छन् ।

संघीय सरकारका कारण कर्मचारीको चरम अभाव झेल्नुपरेको भन्दै उनले भने ‘यो विधेयकलाई छिटोभन्दा छिटो पास गरौं, यसो गर्न सकिए हामी आफ्नै कर्मचारी भर्ना गर्न पाउँछौं ।’

विधेयकले प्रदेश निजामती सेवामा आर्थिक योजना तथा तथ्यांक सेवा, इन्जिनियरिङ, कृषि, प्रशासन, वन, शिक्षा र स्वस्थ्य गरेर सात सेवा समूह छुट्याइएको छ । तह भने १० तह हुनेछ ।

सहातक तेस्रो तहबाट सुरु हुनेछ र अधिकृत १२ औं तहसम्म हुनेछ । तेस्रो तहमा पूर्ण खुला प्रतिस्पर्धा हुनेछ भने बढुवामा खुलासँगै कार्यक्षमता, आन्तरिक परीक्षा र जेष्ठता र कार्यसम्पादन मूल्यांकनका आधारमा निश्चित प्रतिशत हुनेछ ।

प्रदेश निजामती सेवामा नवौं तहसम्म खुला प्रतिस्पर्धाबाट प्रवेश खुला गरिएको छ ।

सब्य र भब्य तरिका ले आफ्नो धारणा राख्नुहोस।